Palpung Jaling

Padma Vajra Puja Text

November 9, 2015

PDF	TibetDoc
File size 4.32MB	File size 50KB

Padma Vajra gyi dkyil 'khor grub chen brgyad cu'i sgrub thabs las byang las rim brgya rtsa; rig 'dzin mi 'gyur rdo rje drag po nus ldan rtsal gyis gru gu'i lha brag nas gter nas bton pa bzhugs so;

German Kagyu Monlam text

Unicode	For iPad and other tablets	TibetDoc	For iPad and iPhone only	azw3
189KB	2.25MB	192KB	160KB	599KB

Kamalashila Institute®

For Buddhist Study and Meditation

Kirchstrasse 22a, D-56729 Langenfeld

Tel.: +49 2655 939040, Fax: +49 2655 939041

Office@kamalashila.de,

www.kamalashila.de

Germany

Arya Bhadra Charya Prani Dhana Raja

Text collection from Palchen Choeling Publications

1.
2.
3.
4.
5.
6.

Many thanks to Palchen Choeling Publications
Ralang, South Sikkim, Inida

Chakchen Dawai Odzer

[127]

Pre	Home	Next

October 21, 2015

 

Unicode	PDF	UDP	TibetDoc	ebook	azw3
453KB	1.21MB	1.55KB	500KB	305KB	735KB

Edited by Acharya Karma Gyalwa 2015

http://www.dharmadownload.net/pages/english/Texts/texts_0125.htm

[125]

Pre	Home	Next

June 12, 2015

'phags mchog spyan ras gzigs kyi bsgom bzlas 'gro don mkha' khyab ma'i zin bris nyung bsdus 'gro don char rgyun

Commentary of Dordhen Khachabma by H.H. the 15th Karmapa

Unicode	PDF	UDP	TibetDoc
233KB	79KB	56KB	18KB

http://www.dharmadownload.net/pages/english/Texts/texts_0125.htm

Ngongai Dorsem

Longchen Nyingthig Ngondro'i Ngagdon

rdzogs pa chen po klong chen snying tig gi sngon 'gro'i ngag 'don rnam mkhyen lam bzang gsal byed

Chagmey Richoes

The Words of My Perfect Teacher

Comment here

Mila Gurbum

'jam mgon kong sprul rgya chen bka' mdzod 13th Volume PA

http://www.dharmadownload.net/pages/english/Sungbum/007_rgya-chen-bka%27-mdzod/pages/13_rgya-chen-bka%27-mdzod_pa.htm

Some Sangye Tenzin's text collections

http://www.dharmadownload.net/pages/english/Texts/texts_0122.htm

༄༅། །ཕྱི་ནང་ལྟ་གྲུབ་ཀྱི་ཁྱད་པར་བརྗོད་པ་སྐྱེ་བ་ལྔ་པའི་སྒྲ་དབྱངས་ཞེས་བྱ་བ་བཞུགས་སོ། །

༄༅། །ཨོཾ་བདེ་ལེགས་སུ་གྱུར་ཅིག །སྨན་ལྗོངས་འདིར་སྐྱེས་པའི་ཤེས་ལྡན་རྣམས་ལ་ངེད་ནས་རང་རེའི་ནང་པ་སངས་རྒྱས་པའི་ཆོས་ཀྱི་ལོ་རྒྱུས་ཅུང་ཟད་ཞུ་རྒྱུ་ཡོད།

འོ་སྐོལ་རང་རེའི་ལྗོངས་འདིར་སྐྱེས་པ་ཐམས་ཅད་ལྷ་དཀོན་མཆོག་གསུམ་ངོ་ཤེས་ཤིང་ཆོས་དང་ཆོས་མིན་གྱི་རྣམ་བཞག་མི་ཤེས་པ་ནི་སུ་ཡང་མེད་པས། དཀོན་མཆོག་དང་ལས་འབྲས་ངོ་ཤེས་པ་དེ་ཙམ་བྱུང་བ་ཡང༌། ངེད་རང་དམ་པའི་ཆོས་དར་བའི་ཡུལ་དུ་སྐྱེས་པའི་ཕན་ཡོན་ཡིན།

སྔོན་གྱི་བསོད་ནམས་དགེ་བའི་འཁོར་ལོ་ཆེན་པོ་བཞི་དང་མི་ལྡན་པ་རྣམས་ད་ལྟ་དམ་པའི་ཆོས་དར་བའི་ཡུལ་དུ་སྐྱེ་མི་ནུས་ཤིང༌། ད་རེས་ངེད་རང་རྣམས་སྔོན་བསགས་དགེ་བའི་སྟོབས་ཀྱིས་འཕེན་ཏེ་འཛམ་གླིང་ཆོས་ཚིགས་ས་ཡི་ལྟེ་བ་དཔལ་ལྡན་འབྲུག་པའི་གདུལ་ཞིང་ལྷོ་ཕྱོགས་ནགས་མོའི་ལྗོངས་འདིར་སྐྱེ་བ་ནི་རང་གི་བསོད་ནམས་ཀྱི་མཐུ་ཡིན།

རང་རེའི་ལྗོངས་འདི་རྒྱལ་ཁབ་གཞན་དང་མི་འདྲ་བའི་ལོ་རྒྱུས་ཅུང་ཟད་ཞུ་ན། སྔོན་བདག་ཅག་གི་སྟོན་པ་འདི་ཉིད་རྒྱལ་པོ་གཙུག་ན་ནོར་བུ་དང་དྲི་མེད་ཀུན་ལྡན་སོགས་སུ་སྐྱེ་བ་བཞེས་པའི་སྐབས་ནས་བྱང་ཆུབ་སྤྱོད་པའི་ཡུལ་དུ་བཟུང་ནས་བྱང་ཆུབ་ཀྱི་སྤྱོད་པ་མཐར་ཕྱིན་པའི་གནས་ཡིན།

ཕྱིས་མངོན་པར་སངས་རྒྱས་ཏེ་ཆོས་ཀྱི་འཁོར་ལོ་བསྐོར་ནས་ཉི་མའི་སྙིང་པོའི་མདོ་སྡེ་གསུངས་པའི་སྐབས། སྟོན་པ་འཁོར་དང་བཅས་པའི་སྐུ་ལས་འོད་ཟེར་སྤྲོས་ཏེ་བྱང་ཕྱོགས་ཀྱི་རི་ཀླུང་ནགས་ཁྲོད་འདི་དག་ལ་ཕོག་ནས་དམ་པའི་ཆོས་འབྱུང་བའི་གནས་སུ་བྱིན་གྱིས་བརླབས། མཐར་རྩ་མཆོག་གྲོང་ནས་སྐུ་མྱ་ངན་ལ་འདས་པའི་ཚུལ་སྟོན་ནས། སླར་ཡང་སངས་རྒྱས་གཉིས་པ་ཨོ་རྒྱན་ཐམས་ཅད་མཁྱེན་པའི་སྐུར་བཞེངས་ཏེ་བྱོན་པའི་སྐབས་ཀྱང༌། རང་རེའི་ལྗོངས་འདིར་སྐུ་དངོས་ལན་གཉིས་ཀྱི་བར་དུ་ཞབས་ཀྱིས་བཅགས་ཤིང་བྱིན་གྱིས་བརླབས། ཆོས་ནོར་ཟབ་གཏེར་དཔག་ཏུ་མེད་པ་རྣམས་ཀྱིས་གངས་བྲག་རི་མཚོ་ཐམས་ཅད་བཀང་སྟེ་སྦས་ཡུལ་དུ་བསྒྱུར། བར་དུ་བསྟན་པ་ཕྱི་དར་གྱི་སྐབས་ཙམ་ནས་སྔ་འགྱུར་བཀའ་གཏེར་གྱི་རིང་ལུགས་འཛིན་པའི་གཏེར་འབྱིན་གྲུབ་པའི་སྐྱེས་བུ་རྣམས་དང༌། ཆོས་ལུགས་གྲུབ་མཐའ་སོ་སོའི་མཁས་གྲུབ་ཀྱི་སྐྱེས་ཆེན་དམ་པ་ཇི་སྙེད་ཅིག་བྱོན་པ་རྣམས་ཀྱི་ཞབས་ཀྱིས་བཅགས་ཏེ་བྱིན་གྱིས་བརླབས། ཐ་མ་ལྷ་གནས་ཤིང་རྟ་འབའ་ལྕགས་ཏེ་བླ་མ་ཁ་ལྔའི་ཆོས་ལུགས་མང་དུ་དར་བའི་སྐབས་དེར། བདག་ཅག་ཉི་མ་ལྷོ་ཕྱོགས་པ་སྤྱི་བོ་གནམ་ལ་བསྟན་པ་རྣམས་ཀྱི་བསོད་ནམས་ཀྱི་མེ་ཏོག་གང་ལ་ཕོག་པའི་ལྷ་སྐལ་འཕགས་མཆོག་འཇིག་རྟེན་དབང་ཕྱུག་སྔགས་འཆང་རྡོ་རྗེ་འཛིན་པའི་ཚུལ་དུ་བྱོན་པ་མཐུ་ཆེན་ཆོས་ཀྱི་རྒྱལ་པོ་ངག་དབང་རྣམ་པར་རྒྱལ་བའི་དཔལ་དེ་ཉིད་ལ་ཨོ་རྒྱན་ཐམས་ཅད་མཁྱེན་པའི་རྡོ་རྗེའི་གསུང་གིས་བསྔགས་པའི་ལུང་བསྟན་དང༌། པཎ་ཆེན་ནཱ་རོ་ཏ་པའི་རྣམ་འཕྲུལ་ཆོས་རྗེ་འགྲོ་མགོན་གཙང་པའི་བཀའ་ལུང་གི་ཞལ་ཆེམས་དང༌། ཆོས་སྐྱོང་ཡེ་ཤེས་མགོན་པོས་ཁ་བཞི་ལྷོའི་རྒྱལ་ཁམས་འདུལ་བྱའི་ཞིང་དུ་ཕུལ་བའི་ཉེར་ལེན་ཚོགས་པ་ལས། རྟེན་འབྱུང་ཚོགས་ཤིང་དུས་ལ་བབ་པའི་འབྲས་བུ་སུས་ཀྱང་འགོག་ཏུ་མེད་པར་དམ་ཅན་སྲུང་མ་རྣམས་ཀྱིས་སྣ་ལེན་མཛད་དེ་ལྗོངས་འདིར་ཆིབས་ཁ་བསྒྱུར། མི་བསྲུན་ཀླ་ཀློས་གང་བའི་ལྷོ་རོང་འདིར་ཕྲིན་ལས་རྣམ་བཞིའི་སྒོ་འབུམ་ཕྲག་དུས་གཅིག་ལ་འབྱེད་དེ། ཁྲིམས་མེད་ལ་ཁྲིམས་དང་ལུང་མེད་ལ་ལུང་འདོགས་ཏེ་ལེགས་བྱས་ཀྱི་སྣང་བ་དར་ལ་ཕབ། ཆོས་སྲིད་གདུགས་དཀར་ཟུང་གིས་ད་ལྟའི་བར་དུ་ཕན་བདེའི་གྲིབ་བསིལ་དགུང་ལས་མ་ཡོལ་བར་འགྲོ་རྣམས་བདེ་བར་འཚོ་བའི་བཀའ་དྲིན་མཛད། ཆོས་སྲིད་ལུགས་གཉིས་ཀྱི་ལམ་སྲོལ་བཟང་པོ་འདི་ལ་བརྟེན་ནས་དེང་སང་གི་བར་དུ་གནས་སྐབས་ཀྱི་ཕན་པ་དང་མཐར་ཐུག་གི་བདེ་བ་ཐམས་ཅད་གཞན་ལ་རག་མ་ལས་པར་རང་དབང་རང་བཙན་དུ་གྱུར་པ་ནི་དཔལ་ལྡན་འབྲུབ་པའི་བསྟན་པ་འདི་ཁོ་ནའི་མཐུ་ཡིན་པར་མཁྱེན་དགོས།

དེ་ལྟར་དམ་པའི་ཆོས་ཀྱི་ལམ་སྲོལ་གཙང་མར་བཟུང་བ་ནི་རང་རེའི་རྒྱལ་ཁབ་འདི་ནང་མ་གཏོགས་གཞན་དུ་ཆོས་སྲིད་ཟུང་དུ་འབྲེལ་བའི་ལམ་ལུགས་བཟང་པོ་འདི་འདྲ་མེད་པ་ནི་ཀུན་གྱིས་མཐོང་ཆོས་སུ་མཁྱེན་ནུས་པ་ཡིན།

རྒྱལ་ཁབ་གཞན་དུ་ཕྱི་ནང་གི་ལམ་ཐ་དད་དུ་བཟུང་ནས་ནང་པའི་ཆོས་ཁ་ཡར་རེ་ཡོད་པ་མ་གཏོགས་ཆབ་སྲིད་དམ་པའི་ཆོས་ཀྱིས་བསྐྱངས་ཏེ་རྒྱལ་ཁབ་དཀར་འབྱམས་ཡུག་གཅིག་ཏུ་སོང་བ་བོད་འབྲུག་གཉིས་ཡིན་པ་ལ་བོད་ཀྱི་ཆོས་སྲིད་རྩ་བརླག་ཏུ་སྟོར་ཟིན་ནས་ད་ལྟ་ཆོས་སྲིད་གཙང་མར་བཟུང་བར་རང་རེའི་འདི་ནང་མ་གཏོགས་གཞན་ནའང་མེད་པ་ནི་ཀུན་གྱིས་མཁྱེན་གསལ་དང༌། སྤྱིར་འཛམ་བུ་གླིང་དུ་ཆོས་ལུགས་རིགས་མི་འདྲ་བ་མང་དུ་ཡོད་ཀྱང་གཙོ་བོ་ཕྱི་ནང་གཉིས་སུ་བསྡུ་བ་ཡིན།

དེ་ཡང་ཆོས་འདི་པ་ལས་ཁ་ཕྱིར་ཕྱོགས་ཏེ་སྟོན་པ་གཞན་གྱི་རྗེས་སུ་འབྲངས་ཏེ་འཚེ་བ་ཆོས་སུ་འདོད་པ་ཕྱི་རོལ་པ་དང༌། སྟོན་པ་བཅོམ་ལྡན་འདས་ཀྱི་རྗེས་སུ་འབྲངས་ཏེ་ཕན་པ་ཆོས་སུ་འདོད་པ་ནང་པ་སངས་རྒྱས་པའི་ཆོས་གཉིས་ཡིན།

༈ དེ་གཉིས་ཁྱད་པར་འབྱེད་ཆོས་མང་དུ་ཡོད་ཀྱང་གཙོ་ཆེར་བསྡུ་ན་དོན་ཚན་རྣམ་པ་ལྔ་སྟེ། རྟེན་པ་སྐྱབས་གནས་ཀྱི་ཁྱད་པར། གནས་ལུགས་ལྟ་བའི་ཁྱད་པར། སྒོམ་པ་ལམ་གྱི་ཁྱད་པར། བྱ་བ་སྤྱོད་པའི་ཁྱད་པར། ཐོབ་བྱ་འབྲས་བུའི་ཁྱད་པར་ཏེ་ཁྱད་པར་ལྔའི་སྒོ་ནས་ནང་པའི་བསྟན་པ་ཁྱད་པར་འཕགས་ཚུལ་མཁྱེན་དགོས།

༈ དེ་ལས་དང་པོ་རྟེན་པ་སྐྱབས་གནས་ཀྱི་ཁྱད་པར་ནི། ལྷ་དཀོན་མཆོག་གསུམ་སྐྱབས་སུ་འཛིན་པ་ནང་པ་དང་དེ་ལས་ལྡོག་པ་ནི་ཕྱི་པ་སྟེ། རང་ལུགས་ཀྱི་ལྷ་དཀོན་མཆོག་གསུམ་ཟེར་བ་གང་ལ་ཞུ་སྙམ་ན། སྤངས་རྟོགས་མཐར་ཕྱིན་པ་ནི་སངས་རྒྱས་ཏེ་དཔེར་ན་སྐྱོན་མེད་ཡོན་ཏན་མངའ་བ་སྟོན་པ་ཤཱཀྱའི་རྒྱལ་པོ་ལྟ་བུ་དང༌། ལུང་དང་རྟོགས་པ་གཉིས་ནི་བསྟན་པ་དམ་པའི་ཆོས་ཏེ་དཔེར་ན་བཤད་པའི་ཆོས་དང་སྒྲུབ་པའི་ཆོས་ཟེར་བ་ལྟ་བུ་དང༌། རིག་གྲོལ་གཉིས་དང་ལྡན་པ་ནི་དགེ་འདུན་ཏེ་དཔེར་ན་ཚོགས་མཆོག་ས་ལ་གནས་པའི་བྱང་ཆུབ་སེམས་དཔའ་རྣམས་སོ། །

དེ་གསུམ་ལ་དཀོན་མཆོག་རིན་པོ་ཆེ་ཞེས་ཞུ་བའི་རྒྱུ་མཚན་ཡང༌། སྔོན་བསོད་ནམས་མ་བསགས་པའི་མིས་ནོར་བུ་རིན་པོ་ཆེ་དང་དཀོན་མཆོག་གསུམ་མཇལ་བར་དཀའ་བ་སོགས་ཆོས་མཐུན་དྲུག་གི་སྒོ་ནས་དཔེ་ནོར་བུ་རིན་པོ་ཆེ་དང་མཚུངས་པ་ལས་ཀྱང་སྐྱབས་དཀོན་མཆོག་གསུམ་ཆེས་མཆོག་ཏུ་གྱུར་པའི་ཕྱིར་དཀོན་མཆོག་རིན་པོ་ཆེ་ཞེས་ཞུ་བ་ཡིན་ནོ། །

མདོར་ན་སངས་རྒྱས་འཇིག་རྟེན་དུ་བྱོན་ནས་ཆོས་སྟོན་པས་སངས་རྒྱས་ལ་སྟོན་པའི་འདུ་ཤེས་དང༌། ཆོས་ཉམས་སུ་ལེན་པ་ལས་ས་ལམ་གྱི་ཡོན་ཏན་ཐོབ་པས་ན་ཆོས་ལ་ལམ་གྱི་འདུ་ཤེས་དང༌། ལམ་སྒྲུབ་པའི་ལྟ་སྤྱོད་དགེ་བ་ལ་འདུན་པར་མཐུན་པས་དགེ་འདུན་ལ་གྲོགས་ཀྱི་འདུ་ཤེས་བཞག་ནས་སྟོན་པ་ལམ་གྲོགས་སུ་ཤེས་པའི་སྒོ་ནས་སྐྱབས་སུ་འགྲོ་བ་ནི་རྒྱུ་ཡི་སྐྱབས་གནས་དང༌། རྒྱུ་དེ་ལ་བརྟེན་ནས་མཐར་ཐུག་རང་རྒྱུད་ལ་དཀོན་མཆོག་གི་བྱིན་རླབས་འཇུག་སྟེ་སངས་རྒྱས་ཀྱི་གོ་འཕངས་ནང་ནས་ཐོབ་ཏུ་ཡོད་པ་དེ་ལ་ནང་པ་སངས་རྒྱས་པ་ཞེས་ཞུ་བ་ཡིན་ནོ། །

དེ་ལྟར་ནང་པའི་ཆོས་ཀྱི་རྒྱུ་མཚན་མཁྱེན་པ་རྣམས་ནས་དང་པོ་དཀོན་མཆོག་གི་རང་བཞིན་ངོ་ཤེས་དགོས། བར་དུ་དཀོན་མཆོག་ལ་ཡིད་ཆེས་ཀྱིས་དད་པར་བྱ་དགོས། ཐ་མར་དངོས་པོ་ཆེ་ཕྲ་གང་རུང་དཀོན་མཆོག་མཆོད་པའི་ཆེད་དུ་འབྲེལ་བ་འཇོག་དགོས། འཇིག་རྟེན་པའི་གཏམ་དཔེ་ལས་ཀྱང༌། དཀོན་མཆོག་མཆོད་པ་བདག་མི་ཕམ། །ཟེར་བ་ལྟར། ཞིང་གི་ཡོན་ཏན་བསམ་གྱིས་མི་ཁྱབ་པའི་དབང་གི་འབྲས་བུ་ཕྱི་མ་ལྷ་མིའི་བདེ་འབྲས་ཁྱད་པར་ཅན་ཐོབ་སྟེ་ཐར་པའི་ལམ་དུ་ཚུད་པ་སོགས་ཕན་ཡོན་ཚད་མེད་ཐོབ་པ་དང༌། འཁོར་བའི་སྡུག་བསྔལ་མཐའ་དག་ལ་སྐྱོབ་པའི་ནུས་པ་ནི་ལྷ་དཀོན་མཆོག་གསུམ་ལ་ཡོད་པ་མ་གཏོགས་གཞན་ཚངས་པ་དང་ཁྱབ་འཇུག་ཡེ་ཤུ་སོགས་འཇིག་རྟེན་པའི་ལྷ་མཐུ་བོ་ཆེ་སུ་ལའང་མེད་པར་མཁྱེན་དགོས། དེས་འདི་ཕྱི་བར་དོ་གསུམ་གྱི་སྐྱབས་གནས་དཀོན་མཆོག་ཡིན་པར་ཤེས་པའི་སྒོ་ནས་བློ་རྩེ་དཀོན་མཆོག་ལ་གཏད་ཐུབ་པ་ཞིག་མཛད་ན། དཀོན་མཆོག་གི་ཐུགས་རྗེ་ནམ་ཡང་བསླུ་བ་མེད་པའི་དབང་གིས་གནས་སྐབས་དང་མཐར་ཐུག་གི་བདེ་བ་ཐོབ་པ་སོགས་ཕན་ཡོན་གཞལ་དུ་མེད་པར་ཐོབ་པ་ནི་གདོན་མི་ཟའོ། །

དེ་ལྟར་མ་ཡིན་པ་སྟོན་པ་དབང་ཕྱུག་དང་ཁྱབ་འཇུག་ཡེ་ཤུ་ལ་སོགས་པ་ལྷ་གཞན་འཛིན་ན་གནས་སྐབས་ཀྱི་ལམ་འགྲོས་ཅུང་ཟད་འགྲོ་བ་ལྟར་སྣང་ཡང་མཐར་ཐུག་གི་བདེ་བ་ནི་དེ་དག་གིས་ཀྱང་སྦྱིན་པ་མི་ནུས་ཏེ་དཔེར་ན་བཙོན་པས་བཙོན་པ་གཏོང་ཐམས་མེད་པར་བཞིན་དུ་རང་ཡང་འཁོར་བ་ལས་མ་འདས་པས་གཞན་སྐྱོབ་པར་ག་ལ་ནུས། དེས་ན་ལྷ་དང་བཅས་པའི་འཇིག་རྟེན་ཆེ་རྒྱུ་ཡོངས་ཀྱི་མཐར་ཐུག་གི་སྐྱབས་ནི་སངས་རྒྱས་ཉག་གཅིག་ལས་མེད་པའི་དབང་གིས་བདག་ཅག་གི་སྟོན་པ་ནི་ལྷ་ཡི་ཡང་ལྷར་གྱུར་པ་ཡིན་ནོ། །

དེ་ལྟར་མ་ཤེས་པར་སྐྱབས་གནས་ལོག་པར་སོང་ན་ལོག་པའི་ལམ་དུ་ལྷུང་ནས་འཁོར་བ་མཐའ་མེད་དུ་འཁྱམས་དགོས་བྱུང་བ་ཡིན་པས། ད་ལྟ་ནས་བསམ་གཞིག་ལེགས་པར་གཏོང་ནས་ཕྱི་པའི་ཆོས་ལ་ཕུགས་ཀྱི་འདུན་པ་མི་གཏད་པར་གནས་སྐབས་རྒྱལ་ཁབ་གཞན་གྱི་ལམ་ལུགས་དང་མཐུན་པར་ཡིག་རྩིས་དང་འཕྲུལ་ཐབས། ཚོང་དང་སོ་ནམ་ཕྲལ་སྐད་སོགས་འཇིག་རྟེན་ལ་ཕན་པའི་བྱ་བ་མེད་དུ་མི་རུང་བ་རྣམས་སློབ་སྦྱོང་ཕྲན་བུ་བྱ་དགོས་པ་མ་གཏོགས་ཕུགས་ཀྱི་འདུན་པ་གཏད་ས་རང་རེའི་ནང་པའི་ཆོས་ལས་ལྷག་པ་མེད་དེ། འཇིག་རྟེན་མཁས་པའི་གཏམ་དཔེར། ཕ་ཡིས་གང་བརྟེན་བུ་ཡི་ལམ། ཟེར་བ་ལྟར། རང་ལུགས་ཕ་མེས་ཀྱི་ཆོས་ལུགས་བཟང་པོ་རྒྱབ་ཏུ་དོར་ནས་གཞན་ལུགས་ངན་པ་དང་དུ་བླངས་ཏེ་འཇིག་རྟེན་ཕ་རོལ་ལ་མི་བལྟ་བར་ཚུ་རོལ་མཛེས་པའི་རྗེས་སུ་འབྲངས་ནས་དཀོན་མཆོག་དང་ལས་འབྲས་མེད་པར་བལྟ་ན་ལོག་ལྟས་དགེ་རྩ་ཆད་དེ་ཚེ་རབས་ཀུན་ཏུ་མཐོ་རིས་དང་ཐར་པའི་ལམ་ལས་གོལ་ནས་འགྲོ་ས་ངན་སོང་གི་གཏིང་རྡོ་བྱེད་པ་ལས་གཞན་དུ་མེད་པ་ཡིན།

དེ་ལྟར་དཀོན་མཆོག་ངོ་ཤེས་པའི་སྒོ་ནས་བསོད་ནམས་དགེ་བའི་ལས་ལ་བརྩོན་པར་བྱས་ན་གནས་སྐབས་དང་མཐར་ཐུག་གི་ལམ་འགྲོས་གང་ཡང་དཀོན་མཆོག་གི་ཐུགས་རྗེ་ལས་འབྱུང་ངེས་པ་ཡིན་ཏེ། གཏམ་དཔེ་ལས། འབད་རྩོལ་རི་བོ་ཙམ་བསྐྱེད་པ་བས། །བསོད་ནམས་མེ་སྟག་ཙམ་གསོག་པ་དགའ། །ཟེར་བ་ལྟར་ཀུན་གྱི་ཐུགས་ལ་བསྟར་བར་ཞུ།

༈ ད་ནི་དོན་ཚན་གཉིས་པ་གནས་ལུགས་ལྟ་བའི་ཁྱད་པ་ནི། དེ་ཡང་མཐའ་བྲལ་གྱི་ལྟ་བ་ཁས་ལེན་པ་ནང་པ་དང༌། རྟག་ཆད་ཀྱི་མཐའ་ལ་བརྟེན་པ་ཕྱི་པ་སྟེ། ལྟ་བ་ཞེས་བྱ་བ་གང་ལ་ངོས་འཛིན་སྙམ་ན། རང་རང་སོ་སོའི་བློའི་ཕུགས་གཏད་ས་དེ་ལ་ལྟ་བ་ཟེར་བ་ཡིན།

དེ་ཡང་བློའི་ཁྱད་པར་ལས་དབང་པོ་རབ་རྣམས་ཀྱིས་ལྟ་བ་ཐོས་བསམ་གྱིས་གཏན་ལ་ཕབ་སྟེ་རྣམ་རྟོག་གི་སྤྲོས་པ་ཉེ་བར་ཞི་ནས་གཞིའི་གནས་ལུགས་ལ་སྒྲོ་འདོགས་ཆོད་པ་ནི་ལྟ་བའི་གདེངས་ཐོབ་པ་ཟེར།

དབང་པོ་འབྲིང་གིས་ཕྱི་ནང་གི་ཆོས་ཐམས་ཅད་ལ་མི་རྟག་སྡུག་བསྔལ་སྟོང་དང་བདག་མེད་བཞིའི་དོན་རྟོགས་ཏེ་འཁོར་བ་སྙིང་པོ་མེད་པར་ཤེས་པ་དེ་ལ་ཞེན་ལོག་གི་ལྟ་བ་ཟེར།

དབང་པོ་ཐ་མས་ཀྱང་འཁོར་བའི་བདེ་སྡུག་དང་རྒྱུ་འབྲས་ཀྱི་མཚང་རིག་སྟེ་སྡིག་སྤོང་དགེ་སྒྲུབ་ལ་བརྩོན་པ་ནི་ལས་འབྲས་ཡང་དག་གི་ལྟ་བ་ཟེར།

ལྟ་བ་དེ་གསུམ་གྱི་རྟོགས་བྱ་རིམ་པ་ལྟར་མཐའ་བྲལ་གྱི་ལྟ་བས་འཁོར་བ་གཞི་མེད་དུ་རྟོགས། ཞེན་ལོག་གི་ལྟ་བས་འཁོར་བ་ལས་ངེས་པར་འབྱུང༌། ལས་འབྲས་ཡང་དག་ཏུ་ལྟ་བས་ལས་དང་ལས་ཀྱི་འབྲས་བུ་ལ་ཡིད་ཆེས་པའི་དད་པ་ཐོབ་པ་སྟེ། དེ་གསུམ་ཕྱི་མ་ངན་སོང་གི་སྡུག་བསྔལ་དང་བྲལ་བའི་ལམ་ཐོབ་པ་ཡིན།

འདི་གསུམ་ལས་གཞན་དུ་གྱུར་པ་ཐམས་ཅད་ལོག་པའི་ལྟ་བ་ཡིན། དེ་ལ་ནང་གསེས་སུ་ལྟ་བ་ལོག་པ་སུམ་བརྒྱ་དང་དྲུག་ཅུ་སོགས་མང་དུ་ཡོད་ཀྱང་ཚུར་བསྡུ་ན་གསུམ་སྟེ། མཐོང་བའི་ཆོས་ཚེ་འདི་ག་ཙམ་ལ་སྙིང་པོ་བཟུང་སྟེ་རྐུ་འཕྲོག་གཡོ་སྒྱུ་སོགས་སྡིག་པའི་ལས་ཚབས་ཆེན་བསགས་ནས་དཀོན་མཆོག་དང་ལས་འབྲས་འཇིག་རྟེན་ཕ་རོལ་སོགས་མེད་པར་ལྟ་བ་ནི་ལོག་ལྟ་ཚུར་མཐོང་གི་ལྟ་བ་ཟེར།

རྒྱུ་ནོར་དོན་དུ་གཉེར་བའི་སྒོ་ནས་རྒྱལ་ཁབ་གི་ལམ་ལུགས་དང་འཕྲལ་སྐད་ཡིག་རྩིས་སོགས་ཡོན་ཏན་སད་སུད་ཙམ་གྱིས་རྒྱུད་ཁེངས་ཏེ་ང་འདྲ་བའི་ཡོན་ཏན་དང་རྒྱུ་ནོར་སུ་ལའང་མེད་སྙམ་ནས་རྒན་གཞོན་དང་གོང་འོག་སོགས་ཆོས་དང་ཆོས་མིན་གྱི་རྣམ་འབྱེད་མི་ཤེས་པ་དེ་ལ་བླུན་པོ་རང་མཐོང་གི་ལྟ་བ་ཟེར།

འདིར་སྣང་མནོག་ཆུང་གི་བྱ་བས་མགོ་འཁོར་ཏེ་དགེ་སྡིག་གི་རྣམ་བཞག་གང་ཡང་མེད་པར་ལྟོ་རྒྱབ་འཚོ་ཤེས་པ་ཙམ་ནི་རྨོངས་པ་ལུང་མ་བསྟན་གྱི་ལྟ་བ་ཟེར།

ལྟ་བ་དེ་གསུམ་གྱི་འབྲས་བུ་ཡང་རིམ་པ་ལྟར་ལོག་ལྟས་དམྱལ་བར་ལྟུང་བ་དང༌། རང་མཐོང་གི་ལྟ་བས་ཡི་དྭགས་སུ་འཕེན་པ་དང༌། ལུང་མ་བསྟན་གྱི་ལྟ་བས་དུད་འགྲོར་སྐྱེ་བའི་རྒྱུ་སྟེ། དེ་གསུམ་ཡང་དག་པའི་ལམ་ལས་གོལ་ཏེ་ལོག་པའི་ལམ་དུ་ཞུགས་པའི་དབང་གིས་འཁོར་བ་མཐའ་མེད་དུ་འཁྱམས་ཏེ་སྡུག་བསྔལ་མྱོང་དགོས་པ་ཡིན་ནོ། །

དེས་ན་ད་ལྟ་ཆོས་ལྡན་གྱི་ཡུལ་དུ་སྐྱེས་པའི་སྐབས་བློ་ཁ་ཕྱིར་མ་ལོག་པར་དམ་པའི་ཆོས་འདུན་པ་བྱ་དགོས་ཏེ། འཇིག་རྟེན་མཁས་པའི་གཏམ་ལས། ཟ་ཁ་ནང་བསྟན་སྙིང་ཁ་ཕྱིར་བསྟན་ཟེར་བ་ལྟར། རང་བསྟན་ལ་བསམ་པ་གོ་མ་ལོག་པ་ཞིག་ཅིས་ཀྱང་མཛད་གནང་ཡོད་པར་ཞུ་ཞེས་ཐལ་སྦྱར་གུས་པའི་ངག་གིས་ཞུ་བ་ཡིན་ནོ། །

༈ ད་ནི་དོན་ཚན་གསུམ་པ་སྒོམ་པ་ལམ་གྱི་ཁྱད་པར་ནི། དེ་ཡང་ཞི་ལྷག་ཟུང་འབྲེལ་གྱི་རྣལ་འབྱོར་སྒོམ་པ་ནི་ནང་པ་དང༌། རྟོག་མེད་ཕྱོགས་རེ་བ་སྒོམ་པ་ཕྱི་པ་སྟེ། སྒོམ་པ་ཞེས་བྱ་བ་གང་ལ་ཟེར་སྙམ་ན། གོང་དུ་སྨོས་མ་ཐག་པའི་སོ་སོའི་ལྟ་བ་དེ་དག་ལ་གོམས་འདྲིས་བྱེད་པ་དེ་ནི་སྒོམ་པ་ཟེར་བ་ཡིན།

དེ་ཡང་ལྟ་བ་བཟང་ངན་གྱི་ཁྱད་པར་ལས། རབ་ཀྱི་བྱང་ཆུབ་ཀྱི་ཆོས་སོ་བདུན་ལམ་དུ་བྱེད་དེ་སྒོམ་པ་དང༌། འབྲིང་གིས་བདེན་བཞི་མི་རྟག་བཅུ་དྲུག་སྒོམ་པ་དང༌། ཐ་མས་ཀྱང་འཇིག་རྟེན་པའི་ལམ་ནས་དགེ་སེམས་རྩེ་གཅིག་པའི་སེམས་སྒོམ་པ་སྟེ། དེ་ལྟར་མ་ལྕོགས་པ་རྣམས་ཀྱིས་ཀྱང་བོད་འབངས་ཀྱི་ལྷ་སྐལ་འཕགས་པ་ཐུགས་རྗེ་ཆེན་པོ་ལ་དམིགས་ཏེ་མ་ཎི་བགྲང་བ་དང༌། ཨུ་རྒྱན་གུ་རུ་རིན་པོ་ཆེ་ལ་གསོལ་བ་བཏབ་སྟེ་བཛྲ་གུ་རུ་ཙམ་བགྲང་ཤེས་པ་ནི་རང་རེའི་དམ་པའི་ཆོས་དར་བའི་ཡུལ་དུ་སྐྱེས་པའི་ཕན་ཡོན་ཡིན།

དེ་ལས་གཞན་ཁ་ཕྱིར་ཕྱོགས་ཏེ་ལྟ་བ་ལོག་པའི་ལམ་དུ་ཞུགས་པ་རྣམས་ནི། རང་རྒྱུད་གྲུབ་མཐའ་ངན་པས་བསླད་ཕྱིན་ཆད་བསྒོམ་བྱ་ལྷ་དང་བླ་མ་ངོ་མི་ཤེས་པས་སྐྱབས་མེད། རྒྱལ་བའི་སྐུ་གསུང་ཐུགས་རྟེན་མཇལ་ཡང་དད་པ་སྐྱེ་མི་ཤེས་པས་བྱིན་རླབས་འཇུག་པའི་རྟེན་མེད། འཁོར་བའི་སྡུག་བསྔལ་མཐོང་ཡང་སྐྱོ་བ་སྐྱེ་མི་ཤེས་པས་སྙིང་རྗེ་མེད། ཡིད་ལ་བསམ་རྒྱུ་དང་བསྒོམ་བྱ་རྒྱུ་ནོར་ཁོ་ན་ལས་མེད་པས་བདག་འཛིན་གྱི་འགོང་བུ་ཁོང་དུ་ཞུགས། སེམས་འདོད་པའི་སྦྲུལ་གྱིས་ཟིན་ཏེ་ཉིན་མཚན་མེད་པར་ཐོབ་དང་གོ་ས་ཁོ་ནར་སེམས་པའི་སྙིང་ལས་ཀྱིས་ཁྲེལ་དང་ངོ་ཚ་མེད་པའི་བྱ་བ་གཤོམས་པ་སོགས་མི་བྱེད་པའི་ངེས་པ་ཡང་ག་ལ་ཡོད། ཕྱིའི་རྣམ་འགྱུར་ལ་བལྟས་ཀྱང་རང་བསྟན་ལ་མ་གུས་པའི་སྤྱོད་ལམ་གྱིས་ཆ་ལུགས་ཡ་མ་ཟུང་སྟོན་པ་དང༌། རང་གི་ཡུལ་སྐད་མི་ཤེས་པ་ལྟར་བརྫུ་ནས་སྐད་རིགས་ཡ་མ་ཟུང་གིས་མགོ་སྐོར་བ་དང༌། རང་ལུགས་ཀྱི་ཡུལ་ཆོས་དང་ཕ་མེས་བསྟན་པའི་ལྷ་ཆོས་སྐྱོང་ལའང་ཡིད་མི་ཆེས་པ་དང༌། དམར་སེར་ངུར་སྨྲིག་གི་རྟགས་འཛིན་པའི་དགེ་སློང་ལ་མཚན་ནས་མི་བརྗོད་པར་སྤྲང་ལོང་གི་རྒྱུ་མཚན་བཀོད་དེ་བརྙས་བཅོས་བྱེད་པ་དང༌། སྦྱིན་བདག་གི་དད་པས་སྤྱན་འདྲེན་པ་ལའང་མི་སེར་གྱི་མགོ་བསྐོར་མཁན་ཞེས་སྐུར་འདེབས་ཞུས་ཏེ་བསྟན་ལ་རྨ་འབྱིན་པའི་རིགས་མང་དུ་བྱུང་བ་ནི་ཆོས་སྲིད་ནང་མི་མཐུན་པར་འགྱུར་བའི་སྔ་ལྟས་ཡིན་པས། དེ་ལྟར་བྱུང་བའི་རྒྱུ་ནི་ཕུང་ཀྲོལ་གྱི་ཀུན་གྱི་རྩ་བ་ནོར་ལ་ཐུག་པ་ཡིན་ཏེ། གཞུང་ནས་རྐང་པའི་ས་རྡོ་ཕྱག་ཏུ་བཞེས་ནས་མཐོང་བཟོད་ཆེ་དྲག་པའི་སྐྱོན་ཡིན་ཏེ། འཇིག་རྟེན་མཁས་པའི་གཏམ་ལས། ཞན་པ་མཐོ་ས་བསྐོས་ན། །ཞན་རྟགས་བློ་ནས་འཐོན། །ཟེར་བ་ལྟར། དེ་ལྟར་ངེས་པ་ཡང་ནང་གི་བསམ་པ་ཕྱིའི་རྣམ་འགྱུར་གྱིས་བཏོན་འོང་བའི་གསལ་བ། དེ་དག་གཉའ་རེངས་སུ་མི་གཏོང་བར་རྒྱལ་ཁྲིམས་གསེར་གྱི་གཉའ་ཤིང་ལྟ་བུའི་ལྗིད་ཀྱིས་མནན་ཏེ། རང་ལུགས་ཀྱི་ཆོས་དང་ཁྲིམས་ལུགས་ལ་གནོང་མི་བཀུར་བར་རྣམས་ད་ལྟ་སྔ་གོང་ནས་གཅུན་ཏེ་དམ་སྡོམ་མཛད་པར་འོས་ཏེ། འཇིག་རྟེན་པའི་གཏམ་ལས། དགྲ་དང་བུ་ཚ་ཆུང་ནས་བཏུལ། ཟེར་བའི་དཔེ་ལྟར། དེ་དག་ཐབས་ཀྱིས་ཁ་དྲངས་ཏེ་བསྟན་པ་ལ་འདུན་པ་བྱེད་དུ་བཅུག་ན་ཕྲལ་ཕུགས་གཉིས་ཀ་དགེ་ཞིང་ལེགས་པར་འགྱུར་བ་དང༌། དེ་བཞིན་བསྟན་པའི་སྒོར་ཞུགས་ཏེ་ངན་སྤྱོད་སྣ་དགུ་བྱེད་པའི་རིགས་ཀྱང་ཆོས་ཁྲིམས་དར་གྱི་མདུད་པ་དམ་པོར་འཆིང་དུ་བཅུག་སྟེ་འདུལ་བར་བྱ་དགོས་ཏེ། མཁས་པའི་གཏམ་དཔེ་ལས། ངན་པ་ངན་ངོན་ཐོག་ཏུ་ཚར་མ་བཅད་ན་བཟང་པོ་ལམ་དུ་མི་ཚུད། ཟེར་བ་ལྟར། འཇིག་རྟེན་མ་དད་པའི་རྒྱུར་གྱུར་པ་ཐམས་ཅད་སྤངས་ཤིང་འདུལ་ཁྲིམས་བསླབ་གཞིའི་རྒྱ་ལས་མི་འདའ་བའི་བཅས་ཁྲིམས་དམ་སྡོམ་མཛད་དེ་དམ་པའི་ཆོས་ཀྱི་དབུ་འཕངས་དགུང་དུ་བསྟོད་པའི་ལམ་སྲོལ་བཟང་པོ་གསར་དུ་གཏོད་ན། ཆོས་སྲིད་ལུགས་གཉིས་ཀྱི་བསྟན་པ་ཆུ་དང་འོ་མ་ལྟར་ཡར་རྒྱས་ཅིག་ཅར་དུ་གཏོང་བའི་བློ་གྲོས་ཀྱི་འདུན་པ་ནི་ཆིག་དྲིལ་གྱི་ཐོག་ནས་ཆབ་སྲིད་དམ་པའི་ཆོས་དང་མཐུན་པར་བཟང་ངན་གྱི་ཤན་འབྱེད་ཞིབ་པར་མཛད་ཐུབ་ན། དེ་ལྟར་མཛད་པའི་མཐུ་ལས་རང་རེའི་ཙནྡན་བཀོད་པའི་ལྗོངས་འདི་ནི་ཆོས་དང་སྲིད་ཀྱི་མངའ་ཐང་དབྱར་གྱི་དཔལ་ལ་འགྲན་པ་ལྟ་བུར་འགྱུར་བའི་མཐུན་འགྱུར་ལྷ་དང་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱིས་མི་མངོན་དབྱིངས་ནས་གཟིགས་ཏེ་བསྟན་དང་འགྲོ་ལ་ཕན་བདེ་སྩོལ་བ་ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་ལྟར་འབད་མེད་དུ་བསྒྲུབ་པའི་ཕྲིན་ལས་མཛད་པར་ཞལ་བཞེས་གནང་འདུག་པས་ཞུ་ཧམ་དུ་མ་དགོངས་པར་ཕྱག་བཞེས་བསྟར་བར་ཞུ།

༈ ད་ནི་དོན་ཚན་བཞི་པ་བྱ་བ་སྤྱོད་པའི་ཁྱད་པར་ནི། དེ་ཡང་སྤྱོད་པ་གཞན་ལ་འཚེ་བ་ལམ་གྱི་གེགས་སུ་འདོད་པ་ནང་པ་དང༌། དེ་ལས་ལྡོག་པ་ནི་ཕྱི་པ་སྟེ། སྤྱོད་པ་ཟེར་བ་གང་ཡིན་སྙམ་ན། ལུས་ངག་གི་བྱ་སྤྱོད་ལ་སྤྱོད་པ་ཟེར་བ་ཡིན། དེ་ལ་ངན་སྤྱོད་དང་བཟང་སྤྱོད་གཉིས་སུ་ཡོད་པ་ལས། བཟང་པོའི་སྤྱོད་པ་ནི་ལུས་ངག་སྐྱ་ལངས་ཀྱི་དབང་དུ་མི་གཏོང་བར་སེམས་ཀྱིས་གཅུན་ཏེ་ཡ་རབས་བཟང་པོའི་ཚུལ་དང་མཐུན་པར་བཅོས་པ་ནི་བཟང་པོའི་སྤྱོད་པ་ཟེར། གཙོ་ཆེ་ནང་གི་ལྟ་བ་བཟང་ངན་གྱི་ཁྱད་པར་ལས་ཕྱིའི་སྤྱོད་པ་ཡང་མི་འདྲ་བ་བྱུང་བ་ཡིན། དཔེར་ན་ཐེག་ཆེན་བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་གཙོ་བོ་ཕྱིན་དྲུག་བསྡུ་དངོས་བཞི་ལ་བརྟེན། ཐེག་དམན་ཉན་རང་གི་སྤྱོད་པ་ནི་གཙོ་བོ་འདུལ་ཁྲིམས་ཉིས་བརྒྱ་ལྔ་བཅུ་རྩ་གཅིག་ལ་བྱེད། ཆོས་ལྡན་གྱི་ཡུལ་དུ་སྐྱེས་པའི་མི་རྣམས་ཀྱི་སྤྱོད་པ་ནི་གཙོ་བོ་ལྷ་ཆོས་དགེ་བ་བཅུ་དང་མི་ཆོས་གཙང་མ་བཅུ་དྲུག་ལ་རྟེན་དགོས་པ་ཡིན།

དེ་ཡང་ནི་ནང་གི་བསམ་པ་ཆོས་དང་མཐུན་མི་མཐུན་གྱི་ཁྱད་པར་ལས་ཕྱིའི་སྤྱོད་ལམ་བཟང་ངན་དུ་བྱུང་བ་སྟེ། དཔེར་ན། རྣམ་འགྱུར་ལས་བསམ་པ་གོ །ཟེར་བ་ལྟར། ངེད་རང་ནང་པ་སངས་རྒྱས་པའི་ལུགས་ལ་ཕྱིའི་བྱ་སྤྱོད་ལས་ནང་གི་བསམ་པ་ཤེས་ནུས་ཏེ། དཔེར་ན་སེམས་རྗེ་བོ་ལྟ་བུ་དང་ལུས་ངག་བྲན་ལྟ་བུ་ཡིན་པས་གཙོ་བོ་སེམས་ཡིན། སེམས་དགེ་བ་ལ་ཉེས་པ་མེད། །ཟེར་བ་ལྟར། བསམ་པ་དགེ་དང་མི་དགེའི་ཁྱད་པར་ལས་དགེ་སྡིག་ལྕི་ཡང་གི་ཁྱད་པར་བརྩི་དགོས།

ཁ་ཅིག་བསམ་པ་དཀར་ལ་སྦྱོར་བ་ནག་པོ་བྱེད་པ་ཡང་ཡོད། ཁ་ཅིག་བསམ་པ་གནག་ལ་སྦྱོར་བ་དཀར་པོ་བྱེད་པ་ཡང་ཡོད་དེ། སྔ་མ་ནི་སྡིག་པའི་གཟུགས་བརྙན་ཙམ་ཡིན་དོན་དུ་སྡིག་པ་མེད། ཕྱི་མ་ནི་དགེ་བའི་གཟུགས་བརྙན་ཙམ་ཡིན་དོན་དུ་དགེ་བར་མི་འགྱུར་བའི་ཚུལ་མཁྱེན་དགོས།

འཇིག་རྟེན་ཐམས་ཅད་ལས་ཀྱིས་ཁྲིད། ཟེར་བ་ལྟར། ཕྱི་མའི་བདེ་སྡུག་ཐམས་ཅད་ད་ལྟའི་ལས་དཀར་ནག་གི་རྗེས་སུ་འགྲོ་བ་ཅན་ཡིན་པ་མ་གཏོགས་ཕྱི་པའི་འདོད་པ་ལྟར་རྟག་ཅིང་རང་དབང་ཅན་གྱི་བདེ་སྡུག་སྟེར་མཁན་གྱི་བྱེད་པ་པོ་སུ་འགའ་ཡང་མེད་ཅིང༌། གཏམ་དཔེ་ལས། སྔ་མ་གར་སྐྱེས་ད་ལྟའི་ལུས་ལ་ལྟོས། །ཕྱི་མ་གར་འགྲོ་ད་ལྟའི་སེམས་ལ་ལྟོས། །ཟེར་བ་ལྟར། ད་ལྟ་རང་དབང་ཡོད་དུས་ནས་ཕྱི་མའི་ལམ་རྒྱགས་སྒྲུབ་དགོས་པ་ཡིན།

ངེད་རང་ཆོས་མི་ཤེས་པས་ལམ་ཇི་ལྟར་སྒྲུབ་སྙམ་ན། བསོད་ནམས་ཚོགས་ཀྱི་ཞིང་ས་དགེ་འདུན་དཀོན་མཆོག་ལས་བཟང་བ་མེད། དམ་པའི་ཆོས་ཀྱི་གཙོ་བོ་བསམ་པ་བཟང་བ་ལས་གཞན་མེད། ཕྲལ་ཕུགས་ཀྱི་བློ་གཏད་སའི་སྐྱབས་སངས་རྒྱས་ལས་བཟང་བ་མེད་པར་ཤེས་ནས་དགེ་འདུན་ལ་དམིགས་ཏེ་བསྙེན་བཀུར་གྱི་མཆོད་སྦྱིན་བྱེད་པ་དང༌། དམ་པའི་ཆོས་ལ་དམིགས་ཏེ་གཞན་ཕན་གྱི་སེམས་བསྐྱེད་པ་དང༌། སངས་རྒྱས་ལ་དམིགས་ཏེ་གུས་པའི་ཕྱག་དང་མཆོད་པར་བྱ་དགོས་ཏེ། སྦྱིན་པ་མ་བཏང་ན་ཕྱི་མ་ལོངས་སྤྱོད་མི་འབྱུང༌། བསམ་པ་བཟང་པོ་མ་བསྐྱེད་ན་ཕྱི་མ་མཐོ་རིས་སུ་མི་སྐྱེ། དད་གུས་མེད་ན་ཕྱི་མ་དམ་པའི་ཆོས་དང་མི་མཇལ་བས། དེ་ལྟ་བུའི་འཇུག་ལྡོག་མ་ནོར་བར་བྱེད་ན་ཕྱི་མ་མཐོ་རིས་དང་ཐར་པའི་ལམ་སྣ་ཟིན་ངེས་པ་ཡིན།

དེར་མ་ཟད་གནས་སྐབས་སུ་འཇིག་རྟེན་བདེ་བའི་རྒྱུ་ཡང་དགེ་བ་སྒྲུབ་པ་ལ་གཞན་མེད་དེ། འཇིག་རྟེན་ན་དགེ་བ་སྒྲུབ་མཁན་མང་ན་དཀར་ཕྱོགས་ཀྱི་ལྷ་རྣམས་སྟོབས་བསྐྱེད་ནས་ཆར་ཆུ་དུས་སུ་འབེབས་པ་དང༌། ལོ་ཕྱུགས་ལེགས་པ་སོགས་བྱུང་བ་ཡང་སྤྱི་མཐུན་ལེགས་བྱས་ཀྱི་མཐུ་ཡིན། འཇིག་རྟེན་མི་བདེ་བའི་རྒྱུ་ཡང་སྡིག་པ་སྤྱོད་པ་ལ་གཞན་མེད་དེ། འཇིག་རྟེན་ནང་སྡིག་པ་བསགས་མཁན་མང་ན་ནག་ཕྱོགས་ཀྱི་བདུད་དཔུང་ཁ་དར་ཏེ་ནད་མུག་འཁྲུག་རྩོད་སོགས་འབྱུང་བ་ཆོས་ཉིད་ཡིན་པས། མདོར་ན་གནས་སྐབས་དང་མཐར་ཐུག་གི་བདེ་སྡུག་ཐམས་ཅད་དགེ་སྡིག་ལ་རག་ལས་པས་དེ་བཞིན་ཆེ་ཕྲ་ཐམས་ཅད་ནས་ཡ་རབས་གནའ་བོའི་ལུགས་བཟང་སྲོལ་གཏོད་དེ་སྡིག་སྤོང་དགེ་སྒྲུབ་ཚུལ་བཞིན་ཉམས་སུ་བསྟར་བར་ཞུ།

༈ ད་ནི་དོན་ཚན་ལྔ་པོ་ཐོབ་བྱ་འབྲས་བུའི་ཁྱད་པར་ནི། དེ་ཡང་འབྲས་བུ་ཐར་པ་གསུམ་གང་རུང་ཐོབ་པ་ནང་པ་དང༌། མི་ཐོབ་པ་ཕྱི་པ་སྟེ། དེ་ཡང་འབྲས་བུ་བྱ་བ་གང་ལ་ཟེར་ན། རྒྱུ་རང་རང་གི་ལམ་སྒོམ་པ་ལས་བྱུང་བའི་འབྲས་བུ་བདེ་གནས་ཐོབ་པ་དེ་ལ་ཐོབ་བྱའི་འབྲས་བུ་ཟེར། སྒོམ་པ་ལམ་གྱི་ཁྱད་པར་ལས། བྱང་ཆུབ་ཀྱི་ཆོས་སྒོམ་པ་རྣམས་ཀྱིས་ས་བཅུ་ལམ་ལྔའི་སྤངས་རྟོགས་རྫོགས་ཏེ་རྣམ་མཁྱེན་ཐོབ་པ་དང༌། མི་རྟག་པའི་འདུ་ཤེས་སོགས་ཕྱག་རྒྱ་བཞིའི་དོན་སྒོམ་པ་རྣམས་ཀྱིས་བདེན་དོན་རྟོགས་ཏེ་ཐར་པ་ཐོབ་པ་དང༌། དགེ་སེམས་རྩེ་གཅིག་པ་སྒོམ་པ་རྣམས་ཀྱིས་ཁམས་གོང་མའི་བདེ་བ་ཐོབ་པ་སྟེ། མདོར་ན་གོམས་དང་འདྲིས་པ་རབ་འབྲིང་གསུམ་གྱི་ཁྱད་པར་ལས། རང་རང་གི་ལམ་དང་འབྲས་བུ་ཅི་རིགས་པ་ཐོབ་སྟེ་བདེ་བ་ནས་བདེ་བའི་མཐར་ཐུག་པར་འགྲོ་བ་ཡིན།

ཡང་མི་ཆོས་གཙང་མར་སྤྱོད་པའི་འཇིག་རྟེན་ཁྱིམ་ནང་གནས་པ་རྣམས་ཀྱང་ཆོས་འདི་པ་ལ་དད་པ་ཐོབ་སྟེ་ལྷ་དཀོན་མཆོག་གསུམ་གཙུག་ཏུ་འཛིན་པ་དང༌། ལུས་ངག་གི་དགེ་སྦྱོར་ཕྱག་དང་བསྐོར་བ་ཁ་ཏོན་དང་བཟླས་བརྗོད་སོགས་ལ་བརྩོན་པ་དང༌། མི་དགེ་བའི་ལས་ལས་ལྡོག་སྟེ་དཀར་པོ་དགེ་བའི་བསོད་ནམས་ལ་འབད་པ་དང༌། གཞན་ལ་གནོད་ཅིང་འཚེ་བའི་སེམས་དང་བྲལ་བ་རྣམས་ཀྱང༌། རང་རང་གི་མོས་པ་དང་མཐུན་པར་ཕྱི་མ་མངོན་མཐོ་ཁྱད་པར་ཅན་བདེ་བ་ཅན་ལ་སོགས་པ་དང༌། བདེ་འགྲོ་ལྷ་མིའི་གོ་འཕངས་ཐོབ་ནས་ཆོས་ལྡན་གྱི་རིགས་སུ་སྐྱེས་ཏེ་ཐར་པའི་ལམ་སྣ་ཟིན་ངེས་པ་ཡིན་ནོ། །

དེ་ལ་གཞན་ཁ་ཕྱིར་ཕྱོགས་པ་རྣམས་ཀྱང་ཕྱིན་ཆད་རང་བློ་རང་གིས་བཅོས་ཏེ་བསྟན་པ་དམ་པའི་ཆོས་ལ་འདུན་པར་བྱེད་ན་ཤེས་རིག་གི་ཡོན་ཏན་ལ་བརྟེན་ནས་ཟླ་བ་སྤྲིན་དང་བྲལ་བ་ལྟར་ཉེས་པ་སོར་ཆུད་དེ་ཕྱིས་བསྟན་པ་ལ་ཕན་པའང་འགའ་རེ་མི་འབྱུང་བའི་ངེས་པ་མེད་དེ་དཔེར་ན་སློབ་དཔོན་དཔའ་བོའི་རྣམ་ཐར་བཞིན་ནོ། །

དེ་ལྟར་གོང་དུ་བསྟན་པའི་དོན་ཚན་སྐྱེ་བ་ལྔ་པའི་རྗེས་སུ་འབྲངས་ཏེ་ཆོས་དཀར་དགེ་བའི་ལམ་བཟང་གཡས་སུ་འཁྱིལ་བའི་ཆོས་དུང་དཀར་པོ་འདི་ཉིད། གང་དག་སྲིད་ལམ་དུབ་པའི་མགྲོན་པོ་ལམ་སྟོར་ནས་རྨོངས་པའི་གཉིད་དུ་སོང་བ་གང་དང་གང་གིས་ཐོས་པའི་མོད་ལ་མདོངས་མཐའི་སྒྲ་འཛིན་དུ་དབྱར་རྔ་ཐོས་པ་ལྟར་རྣ་བར་སིམ་པའི་དགའ་བ་ཐོབ་སྟེ། འཇུག་ལྡོག་མ་ནོར་བར་མཛོད་ཅིག་ཅེས་ཞུ་བའི་བརྡར་ཐལ་སྦྱར་ལག་པའི་བར་དུ་བཟུང་ནས། བསྟན་དང་འགྲོ་ལ་སྨན་པའི་ལྷག་བསམ་བཟང་པོའི་དབུགས་ཀྱིས་བསྐུལ་ཏེ་ཆོས་དུང་གི་སྒྲ་སྐད་ཅུང་ཟད་འབྱིན་པ་འདིས་ཀྱང༌། ལྗོངས་འདིར་རྫོགས་ལྡན་གསར་པའི་ལང་ཚོ་མགྲོན་དུ་ཁུག་སྟེ་བསྟན་དང་འགྲོ་ལ་སྨན་པའི་ལེགས་ཚོགས་ཆར་དུ་བསྙིལ་ནས་དགའ་དང་སྐྱིད་པའི་དཔལ་ལ་སྤྱོད་ངེས་པར་བཅས་འཕྲལ་ཕུགས་དགེ་བའི་འདུན་གྲོས་འགའ་ཞིག་ཞུ་བ་ལགས་ན་འདིར་ཚོགས་མཁྱེན་ལྡན་རྣམས་ཀྱི་ཐུགས་ལ་དགོངས་པར་ཞུ་མཁྱེན་མཁྱཻན།། །།ཞེས་ཕྱི་ནང་ལྟ་གྲུབ་ཀྱི་ཁྱད་པར་ཅུང་ཟད་བརྗོད་པ་འདི་ཡང༌། རང་རེའི་ནང་པའི་ཆོས་ལ་མོས་པ་ཐོབ་པ་གོང་འཕེལ་མདོ་ཆེན་དྲག་ཤོས་བླ་མ་དཔལ་འབྱོར་དང༌། ཀྲུ་རིའི་མགྲོན་ཆེན་དྲག་ཤོས་ཚེ་བརྟན་དང༌། ཀུན་སྤེལ་གཙོ་འཛིན་དྲག་ཤོས་རིག་འཛིན་རྡོ་རྗེ་གསུམ་གྱི་གསུང་ངོ་མ་བཟློག་པར་གཡར་ཁྲལ་ཙམ་དུ་བྱམས་ཁང་བཤད་གྲྭ་ནས་དགེ་རིན་པས་སྤེལ་བ་དགེ་ལེགས་སུ་གྱར་ཅིག།  །།

Commetary on Nagarjuna's letter by Je Gedun Rinchen

Je Gedun Rinchen's Text Collection

http://www.dharmadownload.net/pages/english/Sungbum/010_69th-Je-Khenpo-of-Bhutan/69th-Je-Khenpo_pages/69th-Je-Khenpo-index.htm