༈ བཀའ་མདོ་རྒྱུད་དུ་མར་ལུང་གིས་བསྔགས། །
རྗེ་མར་མི་དྭགས་པའི་བརྒྱུད་པ་འཛིན། །
ཡོངས་ཆེ་བཞི་ཆུང་བརྒྱད་བཀའ་བརྒྱུད་མགོན། །
དཔལ་༧རྒྱལ་དབང་ཀརྨ་པ་ལ་འདུད། །
ཡེ་གདོད་ནས་མངོན་པར་སངས་རྒྱས་ཀྱང༌། །
ཐབས་སྙིང་རྗེ་ཆེན་པོས་ཞིང་འདིར་སྤྲུལ། །
མགོན་པདྨ་འབྱུང་གནས་ལུང་བསྟན་ལྟར། །
སྐུ་སྐྱེ་བའི་ཕྲེང་བ་རིམ་པ་ར་བྱོན། །
ལྷོ་འཛམ་བུ་གླིང་གི་བྱང་གི་ཕྱོགས། །
བོད་ཁ་བ་ཅན་གྱི་མདོ་ཁམས་སྨད། །
ཡུལ་ལྷ་ཐོག་ཅེས་པའི་ས་ཡི་ཆར། །
རྗེ་༧ཨོ་རྒྱན་འཕྲིན་ལས་རྡོ་རྗེ་འཁྲུངས། །
མགོན་དུས་གསུམ་མཁྱེན་པོའི་གདན་ས་ཆེ། །
དཔལ་འོག་མིན་མཚུར་ཕུའི་གནྡྷོ་ལར། །
སྐུ་གོང་མ་རིམ་བྱོན་རྣམ་ཐར་བཞིན། །
མཐོ་སེང་གེའི་ཁྲི་ལ་མངའ་གསོལ་མཛད། །
རྗེ་རིག་པའི་རྡོ་རྗེའི་ཞལ་ཆེམས་དང༌། །
སྐྱབས་མཆོག་གྱུར་གླིང་པའི་ལུང་བསྟན་རྣམས། །
བློ་གཟུ་བོར་གནས་ཏེ་མཇལ་བའི་ཚེ། །
ལུང་བསྟན་པའི་འབྲས་བུ་དུས་སུ་སྨིན། །
སྤྱིར་བསྟན་འགྲོ་ཡོངས་ལ་སྙིང་རྗེའི་ལྷ། །
༧སྐྱབས་ཏཱ་ལའི་བླ་མ་དྲིན་རེ་ཆེ། །
སྒོས་བཀའ་བརྒྱུད་བསྟན་པ་ཉམས་པའི་དུས། །
རྗེ་ཏཱ་ཡི་སི་ཏུ་དྲིན་རེ་ཆེ། །
རྗེ་ཨོ་རྒྱན་ཆེན་པོའི་སྦས་པའི་གནས། །
ཡུལ་འབྲས་ལྗོངས་རུམ་བཏེགས་གནྡྷོ་ལར། །
སྐུ་གཟི་བྱིན་འོད་སྟོང་འཕྲོ་བཞིན་དུ། །
མཐོ་སེང་གེ་ཁྲི་ལ་བཞུགས་སུ་གསོལ། །
ཚེ་འདི་ནས་བྱང་ཆུབ་སྙིང་པོའི་བར། །
རྗེ་༧ཀརྨ་པ་དང་མི་འབྲལ་ཞིང༌། །
དཔལ་དམ་པའི་ཆོས་ལ་ལོངས་སྤྱོད་ནས། །
མཐར་རྫོགས་བྱང་ཐོབ་པའི་སྨོན་ལམ་ཤོག། །།
ཚིག །མི་ཉག་མཁན་ཆེན་ཐེག་མཆོག་བསྟན་འཛིན།
དབྱངས། ཚེ་རིང་དབང་རྒྱལ།
ལེན་མཁན། ཚེ་རིང་དབང་རྒྱལ།
པར་པ་དང་སྒྲིགས་སྦྱོར་བ། བདག་མེད་བོད་ཀྱི་གློག་བརྙན་བཟོ་བསྐྲུན་ཁང༌།
No comments:
Post a Comment